2026 жылғы 12-14 мамыр аралығында «Медициналық технологиялар және ақпараттық жүйелер орталығы» АҚ Қазақстан Республикасы Президенті Іс басқармасына қарасты ұйымдардың Бірыңғай HR-жүйесі аясында HR-процестерді дамыту және жетілдіру мәселелері бойынша қызметкерлерге арналған оқыту семинарын ұйымдастырып, өткізді.
Семинардың ашылуына Қазақстан Республикасы Президенті Іс басқармасы Аппаратының басшысы А.С. Исаков қатысып, бұл шараның маңыздылығын және Іс басқармасы жүйесінде кадрлық әлеуетті арттыруға, заманауи HR-тәсілдерді енгізуге және персоналды басқару жүйесін жетілдіруге ерекше назар аударылып отырғанын атап өтті.
Оқыту бағдарламасы аясында қатысушылар персоналды басқарудың заманауи құралдары мен тәсілдерін, кадрлық әлеуетті дамыту, HR-процестердің тиімділігін бағалау, сондай-ақ оларды ұйым қызметіне енгізудің практикалық тетіктерін қарастырды.
Сонымен қатар, кадрлық әкімшілендіруді цифрландыру мәселелеріне ерекше көңіл бөлінді. Семинар барысында «Бірыңғай кадрлық жүйе» ақпараттық жүйесінде жұмыс істеу бойынша практикалық оқыту ұйымдастырылды. Қатысушыларға платформаның функционалдық мүмкіндіктері таныстырылып, кадрлық есепті оңтайландыру және HR-процестердің тиімділігін арттыру бойынша ұсынымдар берілді.
Өткізілген оқыту Қазақстан Республикасы Президенті Іс басқармасына қарасты ұйымдардың Бірыңғай HR-жүйесін дамытудағы маңызды кезеңдердің бірі болды және кадрлық саясатты одан әрі жетілдіруге, персоналды басқару сапасын арттыруға, сондай-ақ HR-менеджменттің заманауи стандарттарын енгізуге бағытталған.
