11–12 ақпан күндері Медициналық технологиялар және ақпараттық жүйелер орталығы «Жасанды интеллект негіздері. Практика: машиналық оқыту, үлкен тілдік модельдер және цифрлық трансформация» атты екі күндік семинар өткізді. Семинар онлайн және офлайн форматта өтіп, оған 60 қызметкер қатысты. Оқу 10:00-ден 16:00-ге дейін жүргізіліп, жалпы көлемі 13 академиялық сағатты құрады. Оқу уақытының шамамен 70 пайызы практикалық жұмысқа, бағдарламалауға және архитектуралық шешімдерді жобалауға арналды.
Іс-шараның мақсаты – мамандардың жасанды интеллект саласындағы қолданбалы құзыреттерін қалыптастыру және AI құралдарын ұйымның қолданыстағы цифрлық инфрақұрылымына енгізуге дайындау. Ерекше назар архитектуралық тәсілдерге, шешімдердің ауқымдылығына және интеллектуалды сервистерді енгізу барысында ақпараттық қауіпсіздікті қамтамасыз ету мәселелеріне аударылды.
Теориялық бөлімді IT-инфрақұрылым және цифрлық технологиялар саласының маманы, техникалық директор Ғалым Тоқмашев жүргізді. Дәріс барысында жасанды интеллект архитектуралары, ML-модельдерді құру қағидаттары, үлкен тілдік модельдердің (LLM) жұмыс істеу механизмдері, сондай-ақ AI-сервистерді корпоративтік IT-ландшафттарға интеграциялау мәселелері қарастырылды. Қатысушылар деректерге негізделген (Data-Driven) басқару модельдерін қалыптастыру, AI-сервистердің қолданыстағы ақпараттық жүйелермен өзара әрекеттесуі, сондай-ақ дербес және қызметтік деректерді өңдеуге байланысты тәуекелдерді талқылады.
Практикалық бөлім толыққанды инженерлік зертхана форматында өтті. Жұмысқа бағдарламашылар мен жобалық менеджерлер белсенді қатысып, модульдік архитектура және сервистік өзара әрекеттесу қағидаттарын ескере отырып, интеллектуалды сервистердің прототиптерін әзірледі. Қатысушылар код жазып, API-интеграцияларды баптады, қосымшалар арасындағы өзара әрекеттесуді іске асырды және сұраныстарды нақты уақыт режимінде өңдеу сценарийлерін тестіледі. Практика барысында заманауи технологиялық құралдар қолданылды: LLM-ді API арқылы интеграциялау, Telegram үшін чат-боттар жасау, webhook механизмдерін баптау, деректерді өңдеу логикасын жобалау, сондай-ақ DevOps тәсілдерінің базалық элементтері – тестілеу, нұсқаларды басқару, әзірлеу орталарын басқару және шешімдерді sandbox ортада прототиптеу. Сыртқы сервистермен өзара әрекеттесудің тұрақтылығы, ауқымдылығы және қауіпсіздігіне ерекше көңіл бөлінді.
Цифрлық экожүйелер, корпоративтік аналитика және жасанды интеллект саласының сарапшысы Жалғасова Альбинаның жетекшілігімен қатысушылар әзірлеудің толық циклінен өтті: техникалық тапсырманы қалыптастыру, шешім архитектурасын жобалау, бағдарламалық іске асыру, қолданыстағы қосымшамен интеграциялау және жұмыс істейтін прототипті көрсету. Жобалық менеджерлер бизнес-процестерді талдап, функционалдық талаптарды қалыптастырса, әзірлеушілер техникалық іске асыру мен интеграцияны қамтамасыз етті.
Жеке блок компьютерлік көру және кескіндерді талдау тақырыбына арналды. Бұл бөлімде деректер сапасы, модельдердің дәлдігі және оларды тәжірибеде қолданудың шектеулері қарастырылды. Қатысушылар детекция нәтижелерін бағалап, кәсіби ортада AI-модельдерді валидациялауға қойылатын талаптарды талқылады.
Талқылаулар барысында жасанды интеллект мамандарды алмастыратын емес, олардың құзыреттерін күшейтіп, процестердің тиімділігін арттыратын құрал екені атап өтілді. «AI құралдарын жай ғана қолдану емес, олардың архитектурасын түсініп, корпоративтік инфрақұрылыммен жүйелі интеграция құру маңызды», – деп атап өтті Жалғасова Альбина практикалық сессия барысында.
Семинар қатысушылардың жоғары деңгейдегі белсенділігін және технологияларды теориялық тұрғыда түсінуден оларды инженерлік тұрғыда іске асыруға дайын екенін көрсетті. Алынған білім мен дағдылар ұйымның стратегиялық цифрлық трансформациясы аясында цифрлық сервистерді одан әрі дамытуға, процестерді автоматтандыруға және ауқымды AI-шешімдерді енгізуге негіз қалайды.
